آئے کچھ ابر کچھ شراب آئے

آئے کچھ ابر کچھ شراب آئے=اس کے بعد آئے جو عذاب آئے

بامِ مینا سے مہتاب اترے=دستِ ساقی میں آفتاب آئے

ہر رگِ خوں میں پھر چراغاں ہو=سامنے پھر وہ بے نقاب آئے

عمر کے ہر ورق پہ دل کو نظر=تیری مہر و وفا کے باب آئے

کر رہا تھا غمِ جہاں‌ کا حساب=آج تم یاد بے حساب آئے

نہ گئی تیرے غم کی سرداری=دل میں‌ یوں روز انقلاب آئے

جل اٹھے بزم غیر کے در و بام=جب بھی ہم خانماں خراب آئے

اس طرح اپنی خامشی گونجی=گویا ہر سمت سے جواب آئے

فیض تھی راہ سر بسر منزل=ہم جہاں پہنچے کامیاب آئے

کبھی اے حقیقت منتظر نظر آ لباس مجاز میں

کبھی اے حقیقت منتظر نظر آ لباس مجاز میں=کہ ہزاروں سجدے تڑپ رہے ہیں‌میری جبین نیاز میں

طرب آشنائے خروش ہو، تو نوا ہے محرم گوش ہو=وہ سرور کیا کہ چھپا ہوا ہو سکوت پردہ ساز میں

تو بچا بچا کہ نہ رکھ سے، ترا آئنہ ہے وہ آئنہ=کہ شکستہ ہو تو عزیز تر ہے نگاہ آئنہ ساز میں

دم طوف کرمک شمع نے یہ کہا کہ وہ اثر کہن=نہ تری حکایت سوز میں، مہ میری حدیث گداز میں

نہ کہیں جہاں میں اماں ملی، جو اماں ملی تو کہاں ملی=مرے جرم خانہ خراب کو ترے عفو بندہ نواز میں

نہ وہ عشق میں رہیں گرمیاں، نہ وہ حسن میں رہیں شوخیاں=نہ وہ غزنوی میں تڑپ رہی، نہ وہ خم ہے زلف ایاز میں

جو میں سربسجدہ ہوا کبھی، تو زمیں سے آنے لگی صدا=ترا دل تو ہے صنم آشنا، تجھے کیا ملے گا نماز میں

لے سانس بھی آہستہ کہ نازک ہے بہت کام

جس سر کو غرور آج ہے یاں تاج وری کا=کل اس پہ یہیں شور ہے پھر نوحہ گری کا

آفاق کی منزل سے گیا کون سلامت=اسباب لٹا راہ میں یاں ہر سفری کا

زنداں میں بھی شورش نہ گئی اپنے جنوں کی=اب سنگ مداوا ہے اس آشفتہ سری کا

ہر زخمِ جگر داورِ محشر سے ہمارا=انصاف طلب ہے تری بیداد گری کا

اپنی تو جہاں آنکھ لڑی پھر وہیں دیکھو=آئینے کو لپکا ہے پریشاں نظری کا

صد موسمِ گُل ہم کو تہِ بال ہی گزرے=مقدور نہ دیکھا کبھی بے بال و پری کا

اس رنگ سے چمکے ہے پلک پر کہ کہے تو=ٹکرا ہے ترا اشک، عقیقِ جگری کا

لے سانس بھی آہستہ کہ نازک ہے بہت کام=آفاق کی اس کارگہِ شیشہ گری کا

ٹک میر جگرِ سوختہ کی جلد خبر لے=کیا یار بھروسہ ہے چراغِ سحری کا

نقش فریادی ہےکس کی شوخئ تحریر کا

نقش فریادی ہےکس کی شوخئ تحریر کا=کاغذی ہے پیرہن ہر پیکرِ تصویر کا

کاوکاوِ سخت جانی ہائے تنہائی نہ پوچھ=صبح کرنا شام کا، لانا ہے جوئے شیر کا

جذبۂ بے اختیارِ شوق دیکھا چاہیے=سینۂ شمشیر سے باہر ہے دم شمشیر کا

آگہی دامِ شنیدن جس قدر چاہے بچھائے=مدعا عنقا ہے اپنے عالمِ تقریر کا

بس کہ ہوں غالب، اسیری میں بھی آتش زیِر پا=موئے آتش دیدہ ہے حلقہ مری زنجیر کا

محفل فورم کی پہلی سالگرہ کے موقعے پر۔۔

یہ تحریر محفل فورم کی پہلی سالگرہ کے موقعے پر لکھی گئی تھی۔
عزیز دوستان السلام علیکم اور آپ سب کو محفل فورم کی پہلی سالگرہ مبارک ہو کہ اس کی کامیابی اور مقبولیت آپ ہی کی وجہ سے ہے۔ ابھی کل ہی کی بات لگتی ہے کہ میں نے یہ فورم سیٹ‌اپ کی تھی۔ اس وقت محض شغل کے طور پر یہ تجربہ کیا تھا۔ میرا ارادہ تو یہ تھا کہ یہ فورم سیٹ اپ کرکے دوستوں کے حوالے کر دوں تاکہ وہ خود ہی اسے چلائیں۔ مجھے فورم کی ایڈمنسٹریشن تو درکنار، کسی فورم پر پوسٹ کرنے تک کا نہیں پتا تھا۔ لیکن جب کسی اور نے اس فورم کا انتظام سنبھالنے میں دلچسپی نہیں لی تو میں نے یہ ذمہ داری سنبھالی اور جو کام محض شغل کے طور پر کیا تھا وہ رفتہ رفتہ پہلے جان پھر جانِ جان اور پھر جانِ جانان بن گیا اور ہم پہلے خان پھر خانخان اور پھر خانخانان بنتے گئے ۔ حقیقت میں محفل فورم جاگتی حالت میں میرے حواس پر سوار رہتی ہے (اور اکثر حالت خواب میں بھی ایسا ہی ہوتا ہے :P )۔اردو ویب کے قیام کا مقصد، جیسے کہ سب کو معلوم ہے، کمپیوٹر اور انٹرنیٹ پر اردو کی ترویج ہے۔ ہماری خوش قسمتی ہے کہ اس سفر میں ہمیں بہت مخلص دوستوں کا ساتھ نصیب ہوا ہے۔ سب سے پہلے تو یاہو اردو کمپیوٹنگ گروپ کے ہیوی ویٹس اعجاز اختر صاح، جیسبادی اور جناب شارق مستقیم نے ہماری برابر حوصلہ افزائی کی۔ دوسری جانب ہر دور میں فورم کی رونقوں کو دوبالا کرنے کے لیے کوئی نہ کوئی دوست سرگرم رہے ہیں۔مجھے نہایت خوشی ہے کہ اردو ویب پر تاریخی اہمیت کے پراجیکٹس پر کام جاری ہے۔ ان میں لائبریری پراجیکٹ، سوفٹویر کی اردو لوکلائزیشن اور اردو لغت پراجیکٹ‌ شامل ہیں۔ اس کے علاوہ کئی سوفٹویر پراجیکٹس پر بھی کام جاری ہے جو اردو کی ترویج میں سنگ میل ثابت ہو سکتے ہیں۔ مذکورہ بالا ہر پراجیکٹ کا جائزہ الگ سے ایک تفصیلی تحریر کا متقاضی ہے اور یقیناً دوسرے دوست اس پر کچھ لکھ رہے ہوں گے۔ابھی ہمارے سامنے کئی منازل جنہیں ہمیں طے کرنا ہے۔ اردو دنیا کی بڑی زبانوں میں مانی جاتی ہے لیکن بدقسمتی سے انٹرنیٹ پر اس زبان میں مواد نہ ہونے کے برابر رہا ہے۔ میرے اندازے کے مطابق کچھ عرصہ پہلے تک اردو کا مواد یا تو بی بی سی کی اردو ویب سائٹ‌پر ہوتا تھا یا پھر اردو بلاگز پر۔ اب غالبا محفل فورم بھی اس میں شامل ہے۔ اردو ویب پر جاری ہونے والا اردو فورم سوفٹویر اردو کی ترویج کی راہ میں ایک اہم سنگ میل ہے۔ ہم انشاءاللہ دوسرے کونٹینٹ منیجمنٹ سسٹمز جیسے کہ ورڈ پریس اور جملہ کے اردو ورژن ریلیز کریں گے جن سے اردو کونٹینٹ پبلش کرنا اور آسان ہوجائے گا۔اگرچہ اردو ویب پر تمام پراجیکٹس پر کام آگے بڑھ رہا ہے لیکن میرے نزدیک ایک پہلو ابھی تک تشنہ ہے اور وہ ہے ایک آن لائن جریدے کا اجراء۔ اس کی راہ میں اگرچہ چند تکنیکی رکاوٹیں حائل ہیں جیسے کہ خاص ایک جریدے کے لیے کونٹینٹ منیجمنٹ سسٹم کی عدم دستیابی وغیرہ لیکن میرے لیے بڑی مشکل اس کو وقت نہ دے سکنا ہے۔ بہرحال میں امید کرتا ہوں کہ کبھی اس سلسلے میں بھی کوئی پیشرفت ہوگی۔محفل فورم کا ایک سال تو نہایت کامیابی سے مکمل ہوگیا ہے۔ میں دعا گو ہوں کہ آنے والا سال ہمارے لیے مزید کامیابیوں کا سال ثابت ہو۔ آمین۔